ನ.15ರಿಂದ ಬೆಂಗಳೂರು–ಗೋವಾ ನಡುವೆ ವಂದೇ ಭಾರತ್ ರೈಲು ಸಂಚಾರ ಆರಂಭ: ಮುರ್ಡೇಶ್ವರ, ಗೋಕರ್ಣ ರಸ್ತೆ, ಕಾರವಾರದಲ್ಲಿ ನಿಲುಗಡೆ

ಉತ್ತರ ಕನ್ನಡ: ಕರ್ನಾಟಕ ಮತ್ತು ಗೋವಾ ನಡುವಿನ ರೈಲು ಸಂಪರ್ಕವನ್ನು ಮತ್ತಷ್ಟು ಬಲಪಡಿಸುವ ನಿಟ್ಟಿನಲ್ಲಿ ಯಶವಂತಪುರ (ಬೆಂಗಳೂರು)–ಮಡಗಾಂವ್ ನಡುವೆ ಹೊಸ ವಂದೇ ಭಾರತ್ ಎಕ್ಸ್‌ಪ್ರೆಸ್ ರೈಲು ಸೇವೆ ಆರಂಭವಾಗಲಿದೆ. ನವೆಂಬರ್ 15ರಿಂದ ನಿಯಮಿತ ಸಂಚಾರ ಪ್ರಾರಂಭವಾಗಲಿದ್ದು, ಇದಕ್ಕೂ ಮುನ್ನ ನವೆಂಬರ್ 13ರಂದು ಎರಡು ಉದ್ಘಾಟನಾ ವಿಶೇಷ ರೈಲುಗಳನ್ನು ಓಡಿಸಲು ನೈಋತ್ಯ ರೈಲ್ವೆ ನಿರ್ಧರಿಸಿದೆ.

ಬೆಂಗಳೂರು, ಮಂಗಳೂರು ಹಾಗೂ ಗೋವಾ ನಡುವಿನ ಪ್ರಯಾಣವನ್ನು ವೇಗವಾಗಿ ಮತ್ತು ಆರಾಮದಾಯಕವಾಗಿಸುವ ಉದ್ದೇಶದಿಂದ ರೈಲ್ವೆ ಸಚಿವಾಲಯ ಈ ಸೇವೆಗೆ ಅನುಮೋದನೆ ನೀಡಿದೆ. ಈ ಕುರಿತು ನೈಋತ್ಯ ರೈಲ್ವೆ ಹಾಗೂ ಕೊಂಕಣ ರೈಲ್ವೆ ನವೆಂಬರ್ 11ರಂದು ಪ್ರತ್ಯೇಕ ಪತ್ರಿಕಾ ಪ್ರಕಟಣೆಗಳನ್ನು ಹೊರಡಿಸಿವೆ.

ಹೊಸ ವಂದೇ ಭಾರತ್ ರೈಲು ಸೇವೆಯ ಉದ್ಘಾಟನೆ ಹಿನ್ನೆಲೆಯಲ್ಲಿ ನವೆಂಬರ್ 13ರಂದು ಎರಡು ವಿಶೇಷ ರೈಲುಗಳು ಸಂಚರಿಸಲಿವೆ.

ರೈಲು ಸಂಖ್ಯೆ 06512 ಬೆಂಗಳೂರು–ಮಡಗಾಂವ್ ವಿಶೇಷ ರೈಲು ಸರ್ ಎಂ. ವಿಶ್ವೇಶ್ವರಯ್ಯ ಟರ್ಮಿನಲ್ ಬೆಂಗಳೂರಿನಿಂದ ಮಧ್ಯಾಹ್ನ 1.30ಕ್ಕೆ ಹೊರಟು ಮರುದಿನ ಮುಂಜಾನೆ 2.55ಕ್ಕೆ ಮಡಗಾಂವ್ ತಲುಪಲಿದೆ. ಈ ರೈಲು ಶ್ರವಣಬೆಳಗೊಳ, ಹಾಸನ, ಸಕಲೇಶಪುರ, ಸುಬ್ರಹ್ಮಣ್ಯ ರಸ್ತೆ, ಕಬಕಪುತ್ತೂರು, ಮಂಗಳೂರು ಜಂಕ್ಷನ್, ಉಡುಪಿ, ಕುಂದಾಪುರ, ಮೂಕಾಂಬಿಕಾ ರಸ್ತೆ ಬೈಂದೂರು, ಮುರ್ಡೇಶ್ವರ, ಗೋಕರ್ಣ ರಸ್ತೆ ಹಾಗೂ ಕಾರವಾರ ನಿಲ್ದಾಣಗಳಲ್ಲಿ ನಿಲುಗಡೆ ಹೊಂದಲಿದೆ.

ರೈಲು ಸಂಖ್ಯೆ 06213 ಮಂಗಳೂರು–ಬೆಂಗಳೂರು ವಿಶೇಷ ರೈಲು ಮಂಗಳೂರು ಜಂಕ್ಷನ್‌ನಿಂದ ಮಧ್ಯಾಹ್ನ 1.30ಕ್ಕೆ ಹೊರಟು ಅದೇ ದಿನ ರಾತ್ರಿ 9 ಗಂಟೆಗೆ ಸರ್ ಎಂ. ವಿಶ್ವೇಶ್ವರಯ್ಯ ಟರ್ಮಿನಲ್ ಬೆಂಗಳೂರು ತಲುಪಲಿದೆ. ಈ ರೈಲು ಕಬಕಪುತ್ತೂರು, ಸುಬ್ರಹ್ಮಣ್ಯ ರಸ್ತೆ, ಸಕಲೇಶಪುರ, ಹಾಸನ ಹಾಗೂ ಶ್ರವಣಬೆಳಗೊಳ ನಿಲ್ದಾಣಗಳಲ್ಲಿ ನಿಲುಗಡೆ ಹೊಂದಲಿದೆ. ಎರಡೂ ಉದ್ಘಾಟನಾ ವಿಶೇಷ ರೈಲುಗಳು ತಲಾ 16 ಬೋಗಿಗಳನ್ನು ಹೊಂದಿರಲಿವೆ.

ನವೆಂಬರ್ 15ರಿಂದ ರೈಲು ಸಂಖ್ಯೆ 26655 ಯಶವಂತಪುರ–ಮಡಗಾಂವ್ ಹಾಗೂ 26656 ಮಡಗಾಂವ್–ಯಶವಂತಪುರ ವಂದೇ ಭಾರತ್ ಎಕ್ಸ್‌ಪ್ರೆಸ್ ರೈಲುಗಳು ನಿಯಮಿತವಾಗಿ ಸಂಚರಿಸಲಿವೆ. ರೈಲು ಸಂಖ್ಯೆ 26655 ಯಶವಂತಪುರದಿಂದ ವಾರದಲ್ಲಿ ಆರು ದಿನ ಸಂಚರಿಸಲಿದ್ದು, ಬುಧವಾರ ಸೇವೆ ಇರುವುದಿಲ್ಲ. ರೈಲು ಸಂಖ್ಯೆ 26656 ಮಡಗಾಂವ್‌ನಿಂದ ವಾರದಲ್ಲಿ ಆರು ದಿನ ಸಂಚರಿಸಲಿದ್ದು, ಗುರುವಾರ ಸೇವೆ ಇರುವುದಿಲ್ಲ.

ಯಶವಂತಪುರ ಜಂಕ್ಷನ್‌ನಿಂದ ಬೆಳಿಗ್ಗೆ 7.35ಕ್ಕೆ ಹೊರಡುವ ರೈಲು ಅದೇ ದಿನ ರಾತ್ರಿ 8.55ಕ್ಕೆ ಮಡಗಾಂವ್ ತಲುಪಲಿದೆ. ಮಾರ್ಗಮಧ್ಯೆ ಶ್ರವಣಬೆಳಗೊಳದಲ್ಲಿ ಬೆಳಿಗ್ಗೆ 9.03ಕ್ಕೆ ಆಗಮಿಸಿ 9.05ಕ್ಕೆ ನಿರ್ಗಮಿಸಲಿದೆ. ಹಾಸನಕ್ಕೆ 9.38ಕ್ಕೆ ಆಗಮಿಸಿ 9.40ಕ್ಕೆ ಹೊರಡಲಿದೆ. ಸಕಲೇಶಪುರಕ್ಕೆ 10.20ಕ್ಕೆ ಆಗಮಿಸಿ 10.22ಕ್ಕೆ ನಿರ್ಗಮಿಸಲಿದೆ. ಸುಬ್ರಹ್ಮಣ್ಯ ರಸ್ತೆಗೆ 12.40ಕ್ಕೆ ಆಗಮಿಸಿ 12.42ಕ್ಕೆ ಹೊರಡಲಿದೆ. ಕಬಕಪುತ್ತೂರಿಗೆ 13.25ಕ್ಕೆ ಆಗಮಿಸಿ 13.27ಕ್ಕೆ ನಿರ್ಗಮಿಸಲಿದೆ.

ಮಂಗಳೂರು ಜಂಕ್ಷನ್‌ಗೆ ಮಧ್ಯಾಹ್ನ 15.05ಕ್ಕೆ ಆಗಮಿಸಿ 15.15ಕ್ಕೆ ಹೊರಡಲಿದೆ. ಉಡುಪಿಗೆ 16.20ಕ್ಕೆ ಆಗಮಿಸಿ 16.22ಕ್ಕೆ ನಿರ್ಗಮಿಸಲಿದೆ. ಕುಂದಾಪುರಕ್ಕೆ 16.38ಕ್ಕೆ ಆಗಮಿಸಿ 16.40ಕ್ಕೆ ಹೊರಡಲಿದೆ. ಮೂಕಾಂಬಿಕಾ ರಸ್ತೆ ಬೈಂದೂರಿಗೆ 17.20ಕ್ಕೆ ಆಗಮಿಸಿ 17.22ಕ್ಕೆ ನಿರ್ಗಮಿಸಲಿದೆ. ಮುರ್ಡೇಶ್ವರಕ್ಕೆ 18.00ಕ್ಕೆ ಆಗಮಿಸಿ 18.02ಕ್ಕೆ ಹೊರಡಲಿದೆ. ಗೋಕರ್ಣ ರಸ್ತೆಗೆ 19.00ಕ್ಕೆ ಆಗಮಿಸಿ 19.02ಕ್ಕೆ ನಿರ್ಗಮಿಸಲಿದೆ. ಕಾರವಾರಕ್ಕೆ 19.45ಕ್ಕೆ ಆಗಮಿಸಿ 19.47ಕ್ಕೆ ಹೊರಡಲಿದ್ದು, ಮಡಗಾಂವ್‌ಗೆ ರಾತ್ರಿ 20.55ಕ್ಕೆ ತಲುಪಲಿದೆ.

ಮಡಗಾಂವ್‌ನಿಂದ ಯಶವಂತಪುರಕ್ಕೆ ತೆರಳುವ ರೈಲು ಸಂಖ್ಯೆ 26656 ಬೆಳಿಗ್ಗೆ 8.20ಕ್ಕೆ ಹೊರಟು ಅದೇ ದಿನ ರಾತ್ರಿ 9.15ಕ್ಕೆ ಯಶವಂತಪುರ ತಲುಪಲಿದೆ. ಕಾರವಾರಕ್ಕೆ 9.03ಕ್ಕೆ ಆಗಮಿಸಿ 9.05ಕ್ಕೆ ನಿರ್ಗಮಿಸಲಿದೆ. ಗೋಕರ್ಣ ರಸ್ತೆಗೆ 9.48ಕ್ಕೆ ಆಗಮಿಸಿ 9.50ಕ್ಕೆ ಹೊರಡಲಿದೆ. ಮುರ್ಡೇಶ್ವರಕ್ಕೆ 11.00ಕ್ಕೆ ಆಗಮಿಸಿ 11.02ಕ್ಕೆ ನಿರ್ಗಮಿಸಲಿದೆ. ಮೂಕಾಂಬಿಕಾ ರಸ್ತೆ ಬೈಂದೂರಿಗೆ 11.20ಕ್ಕೆ ಆಗಮಿಸಿ 11.22ಕ್ಕೆ ಹೊರಡಲಿದೆ. ಕುಂದಾಪುರಕ್ಕೆ 11.48ಕ್ಕೆ ಆಗಮಿಸಿ 11.50ಕ್ಕೆ ನಿರ್ಗಮಿಸಲಿದೆ. ಉಡುಪಿಗೆ 12.18ಕ್ಕೆ ಆಗಮಿಸಿ 12.20ಕ್ಕೆ ಹೊರಡಲಿದೆ.

ಮಂಗಳೂರು ಜಂಕ್ಷನ್‌ಗೆ 13.50ಕ್ಕೆ ಆಗಮಿಸಿ 14.00ಕ್ಕೆ ನಿರ್ಗಮಿಸಲಿದೆ. ಕಬಕಪುತ್ತೂರಿಗೆ 14.43ಕ್ಕೆ ಆಗಮಿಸಿ 14.45ಕ್ಕೆ ಹೊರಡಲಿದೆ. ಸುಬ್ರಹ್ಮಣ್ಯ ರಸ್ತೆಗೆ 15.28ಕ್ಕೆ ಆಗಮಿಸಿ 15.30ಕ್ಕೆ ನಿರ್ಗಮಿಸಲಿದೆ. ಸಕಲೇಶಪುರಕ್ಕೆ 17.30ಕ್ಕೆ ಆಗಮಿಸಿ 17.32ಕ್ಕೆ ಹೊರಡಲಿದೆ. ಹಾಸನಕ್ಕೆ 18.13ಕ್ಕೆ ಆಗಮಿಸಿ 18.15ಕ್ಕೆ ನಿರ್ಗಮಿಸಲಿದೆ. ಶ್ರವಣಬೆಳಗೊಳಕ್ಕೆ 18.43ಕ್ಕೆ ಆಗಮಿಸಿ 18.45ಕ್ಕೆ ಹೊರಡಲಿದ್ದು, ಯಶವಂತಪುರಕ್ಕೆ ರಾತ್ರಿ 21.15ಕ್ಕೆ ತಲುಪಲಿದೆ.

ಹೊಸ ವಂದೇ ಭಾರತ್ ಎಕ್ಸ್‌ಪ್ರೆಸ್ ರೈಲು ಒಟ್ಟು 16 ಬೋಗಿಗಳನ್ನು ಹೊಂದಿರಲಿದೆ. ಇದರಲ್ಲಿ ಎಕ್ಸಿಕ್ಯೂಟಿವ್ ಚೇರ್ ಕಾರ್ ಹಾಗೂ ಚೇರ್ ಕಾರ್ ಬೋಗಿಗಳು ಇರಲಿವೆ. ಪ್ರಯಾಣಿಕರಿಗೆ ಆಧುನಿಕ ಹಾಗೂ ಆರಾಮದಾಯಕ ಪ್ರಯಾಣದ ಅನುಭವ ಒದಗಿಸುವ ನಿರೀಕ್ಷೆಯಿದೆ.

ಬೆಂಗಳೂರು, ಕರಾವಳಿ ಕರ್ನಾಟಕ ಹಾಗೂ ಗೋವಾ ನಡುವಿನ ಸಂಪರ್ಕ ಸುಧಾರಿಸುವುದರಿಂದ ಪ್ರವಾಸಿಗರು, ಉದ್ಯಮಿಗಳು, ವಿದ್ಯಾರ್ಥಿಗಳು, ಯಾತ್ರಾರ್ಥಿಗಳು ಸೇರಿದಂತೆ ವಿವಿಧ ವರ್ಗದ ಪ್ರಯಾಣಿಕರಿಗೆ ಅನುಕೂಲವಾಗಲಿದೆ. ಉಡುಪಿ, ಕೊಲ್ಲೂರು, ಮುರ್ಡೇಶ್ವರ, ಗೋಕರ್ಣ, ಕಾರವಾರ ಹಾಗೂ ಮಡಗಾಂವ್‌ನಂತಹ ಪ್ರಮುಖ ಪ್ರವಾಸಿ ತಾಣಗಳಿಗೆ ತೆರಳುವವರಿಗೂ ಈ ರೈಲು ಸಂಪರ್ಕ ಸಹಕಾರಿಯಾಗಲಿದೆ.

ಹೊಸ ಯಶವಂತಪುರ–ಮಡಗಾಂವ್ ವಂದೇ ಭಾರತ್ ಸೇವೆ ಆರಂಭವಾಗುವ ಹಿನ್ನೆಲೆಯಲ್ಲಿ ಪ್ರಸ್ತುತ ಸಂಚರಿಸುತ್ತಿರುವ ರೈಲು ಸಂಖ್ಯೆ 20645/20646 ಮಡಗಾಂವ್–ಮಂಗಳೂರು ಸೆಂಟ್ರಲ್–ಮಡಗಾಂವ್ ವಂದೇ ಭಾರತ್ ಎಕ್ಸ್‌ಪ್ರೆಸ್ ಸೇವೆಯನ್ನು ನವೆಂಬರ್ 15ರಿಂದ ಎರಡೂ ದಿಕ್ಕುಗಳಲ್ಲಿ ಸ್ಥಗಿತಗೊಳಿಸಲಾಗುವುದು ಎಂದು ರೈಲ್ವೆ ಪ್ರಕಟಣೆ ತಿಳಿಸಿದೆ.

ಬೆಂಗಳೂರು ಮತ್ತು ಗೋವಾ ನಡುವಿನ ನೇರ ವಂದೇ ಭಾರತ್ ಸಂಪರ್ಕದೊಂದಿಗೆ ಉತ್ತರ ಕನ್ನಡ ಜಿಲ್ಲೆಯ ಮುರ್ಡೇಶ್ವರ, ಗೋಕರ್ಣ ರಸ್ತೆ ಹಾಗೂ ಕಾರವಾರ ನಿಲ್ದಾಣಗಳಿಗೆ ನಿಗದಿತ ನಿಲುಗಡೆ ದೊರೆಯುತ್ತಿರುವುದು ಜಿಲ್ಲೆಯ ಪ್ರಯಾಣಿಕರಿಗೆ ಮಹತ್ವದ ಬೆಳವಣಿಗೆಯಾಗಿದೆ.